மகாராஷ்டிர முதல்வராகிறார் தேவேந்திர ஃபட்னவீஸ்!

மகாராஷ்டிர பாஜக எம்எல்ஏக்கள் கூட்டம் மும்பையில் இன்று காலை கூடியது. இதில் தற்போதைய துணை முதல்வா் தேவேந்திர ஃபட்னவீஸ் புதிய முதல்வராக (சட்டப்பேரவை பாஜக குழு தலைவா்) தோ்வு செய்யப்பட்டுள்ளார்.

மும்பையில் இன்று மாலை ஆளுநர் சி.பி. ராதாகிருஷ்ணனை சந்தித்து ஆட்சியமைக்க உரிமைகோருகிறார் தேவேந்திர ஃபட்னவீஸ். பிறகு, நாளை மாலை நடைபெறும் நிகழ்ச்சியில், முதல்வராக அவர் பதவியேற்க உள்ளார்.

மகாராஷ்டிர முதல்வா் பதவியேற்பு நிகழ்ச்சி தெற்கு மும்பையில் உள்ள ஆசாத் மைதானத்தில் டிச. 5-ஆம் தேதி மாலை நடைபெறுவதும், அதில் பிரதமா் நரேந்திர மோடி உள்ளிட்ட பாஜக மூத்த தலைவா்கள் பங்கேற்பதும் ஏற்கெனவே உறுதியாகிவிட்டிருக்கும் நிலையில், இன்றைய கூட்டம் முக்கியத்துவம் பெற்றுள்ளது.

மகாராஷ்டிர முதல்வர் பதவியேற்பு நிகழ்ச்சிக்கு முன்பு, இன்று காலை பாஜக எம்எல்ஏக்கள் கூட்டம் நடைபெற்றது. இதில் பாஜக மேலிடப் பாா்வையாளராக மத்திய நிதியமைச்சா் நிா்மலா சீதாராமன், குஜராத் முன்னாள் முதல்வா் விஜய் ரூபானி ஆகியோா் பங்கேற்றனர். இக்கூட்டத்தில், மகாராஷ்டிர முதல்வராக (சட்டப்பேரவை பாஜக தலைவராக) தேவேந்திர ஃபட்னவீஸ் ஒருமனதாகத் தேர்வு செய்யப்பட்டார். எனவே, பாஜக தலைமையிலான மகாயுதி கூட்டணி நாளை ஆட்சியமைக்கவிருக்கிறது.

முதல்வராகத் தோ்வு செய்யப்பட்ட பிறகு கூட்டணித் தலைவா்களுடன் சென்று ஆளுநரைச் சந்தித்து ஆட்சி அமைக்க ஃபட்னவீஸ் உரிமை கோரவிருக்கிறார்.

முக்கிய கூட்டணிக் கட்சிகளான ஏக்நாத் ஷிண்டே தலைமையிலான சிவசேனை, அஜீத் பவாா் தலைமையிலான தேசியவாத காங்கிரஸுக்கு துணை முதல்வா் பதவி வழங்கப்படலாம் என்ற எதிர்பார்ப்பு எழுந்துள்ளது. ஆனால், ஏக்நாத் ஷிண்டே துணை முதல்வர் பதவியை ஏற்பாரா என்பது கேள்விக்குறியாகவே உள்ளது. அவர் உடல்நலம் பாதிக்கப்பட்டு சொந்த ஊரில் மருத்துவமனைக்குச் சென்று சிகிச்சை பெற்று வருவதால் இன்றைய நிகழ்ச்சிகளில் அவர் பங்கேற்பாரா என்பதும் தெரியவில்லை.

பேரவைத் தேர்தல்..

மகாராஷ்டிர பேரவைத் தோ்தல் முடிவு நவ. 23-ஆம் தேதி வெளியானது. இதில் பாஜக-சிவசேனை-தேசியவாத காங்கிரஸ் கூட்டணி மொத்தமுள்ள 288 தொகுதிகளில் 230 இடங்களில் வெற்றி பெற்றது.

கூட்டணிக் கட்சிகளிடையே முதல்வா், துணை முதல்வா் பதவிகள், அமைச்சரவை இடங்கள் குறித்து இறுதி முடிவு எடுப்பதில் ஏற்பட்ட தாமதமே ஆட்சியமைப்பதில் தாமதத்தை ஏற்படுத்தியிருந்தது.

இறுதியாக பாஜகவை சோ்ந்தவா் முதல்வராவாா் என்று இப்போதைய முதல்வா் (பொறுப்பு) ஏக்நாத் ஷிண்டே அறிவித்திருந்தார். அந்த தகவல் தற்போது அதிகாரப்பூர்வமாக வெளியாகியிருக்கிறது.