அரச ஊழியர்களின் போனஸ் கொடுப்பனவுகளுக்கான சுற்றறிக்கை வெளியீடு

அரச கூட்டுத்தாபனங்கள், சட்ட சபைகள் மற்றும் அரசுக்கு சொந்தமான நிறுவனங்களின் ஊழியர்களுக்கு 2024 ஆம் ஆண்டிற்கான போனஸ் வழங்குவது தொடர்பான சுற்றறிக்கையை நிதி திட்டமிடல் மற்றும் பொருளாதார அபிவிருத்தி அமைச்சு வெளியிட்டுள்ளது.

இதன்படி, திறைசேரி செயலாளர் மஹிந்த சிறிவர்தன நேற்று (23) அனைத்து அமைச்சு செயலாளர்கள், அரச கூட்டுத்தாபனங்கள், சட்ட சபைகள் மற்றும் அரச நிறுவனங்களின் தலைவர்களுக்கு இந்த சுற்றறிக்கையை விடுத்துள்ளார்.

இந்த ஆண்டுக்கான போனஸ் எவ்வாறு வழங்குவது என்பது குறித்த பரிந்துரைகள் அந்த சுற்றறிக்கையில் முன்வைக்கப்பட்டுள்ளன.

இலாபத்தை ஈட்டியுள்ள நிறுவனங்களின் ஊழியர்களுக்கு 25,000 அல்லது 20,000 ரூபாவை போனஸாக வழங்குவதற்கு உத்தேசிக்கப்பட்டு வரிக்குப் பிந்திய இலாபத்தில் குறைந்தது 30 வீதத்தை ஈவுத்தொகையாகவோ அல்லது வரியாகவோ கூட்டு நிதிக்கு வழங்குவதற்கு உத்தேசிக்கப்பட்டுள்ளதாக சுற்றறிக்கையில் குறிப்பிடப்பட்டுள்ளது.

அதன் பிரகாரம் குறித்த சுற்றறிக்கையின் ஊடாக இது தொடர்பான போனஸ் வழங்குவதில் கடைப்பிடிக்க வேண்டிய நடைமுறை குறித்து கருவூல செயலாளர் விளக்கமளித்துள்ளதுடன், குறிப்பாக போனஸ் வழங்குவதற்கு திறைசேரி நிதி வழங்காது என திறைசேரி செயலாளர் தெரிவித்துள்ளார்.

அரசாங்கத்திற்குச் சொந்தமான நிறுவனங்களில் பணிபுரியும் ஊழியர்களுக்கு போனஸ் வழங்குவதில் ஏதேனும் சிக்கல்கள் ஏற்பட்டால், அமைச்சர்கள் குழுவின் சிறப்பு அனுமதியைப் பெறுவது கட்டாயமாகும் என்று சுற்றறிக்கையில் மேலும் தெரிவிக்கப்பட்டுள்ளது.