கார் ரேஸ் பயிற்சியின்போது விபத்தில் சிக்கிய, நடிகர் அஜித் குமார் (Video)

துபாயில், கார் ரேஸ் பயிற்சியின்போது ஏற்பட்ட விபத்தில், நடிகர் அஜித் குமார் காயமின்றி தப்பியதாக தகவல் வெளியாகியுள்ளது. ஐக்கிய அரபு எமிரேட்சின் துபாயில் நடைபெறும், ’24 எச் மற்றும் ஐரோப்பிய 24 எச் சாம்பியன்ஷிப் கார் ரேஸ்’ போட்டிகளில் நடிகர் அஜித் குமார் பங்கேற்கிறார். இந்நிலையில், போட்டிக்கு முன் நடந்த கார் ரேஸ் பயிற்சியில் நடிகர் அஜித் குமார் பங்கேற்றார்.

அப்போது, எதிர்பாராதவிதமாக, அவர் ஓட்டிய ரேஸ் கார் விபத்துக்குள்ளாகி, அருகே இருந்த தடுப்புகள் மீது மோதி சுற்றி சுழன்று நின்றது. இதில், காரின் முன்பக்கம் முற்றிலும் சேதமானது. எனினும், அந்த காரில் இருந்து காயம் ஏதுமின்றி அஜித் தப்பியதாக தகவல் வெளியாகி உள்ளது.

பிந்திய தகவல்

கார் பந்தயத்தில் ஆர்வம் கொண்டுள்ள நடிகர் அஜித் குமார், துபாயில் நடந்த கார் பந்தயப் பயிற்சியின்போது விபத்தில் சிக்கினார்.

எதிர்வரும் கார் பந்தயப் போட்டிக்குத் தயாராகும் விதமாக பந்தயத் தடத்தில் அஜித் பயிற்சியில் ஈடுபட்டிருந்தபோது விபத்து ஏற்பட்டது.

விபத்தைக் காட்டும் காணொளி ஒன்று சமூக ஊடகங்களில் வேகமாகப் பரவி வருகிறது. காயம் எதுவுமின்றி அவர் காரிலிருந்து வெளியேறுவது தெரிந்தது.

இச்செய்தியைக் கேள்விப்பட்டு அதிர்ச்சியடைந்த அஜித் ரசிகர்கள், அவர் பாதுகாப்பாக இருப்பது குறித்து நிம்மதிப் பெருமூச்சு விட்டனர். திரைத்துறையில் பரபரப்பான வேலைக்கு மத்தியிலும் கார் பந்தயத்தில் ஆர்வத்தோடு ஈடுபட்டுவரும் அஜித், பலருக்கும் முன்னுதாரணமாகத் திகழ்கிறார்.

துபாய் பயணத்துக்கு முன்னதாக, சென்னை விமான நிலையத்தில் தம் குடும்பத்துக்கு உணர்வுபூர்வப் பிரியாவிடையை அஜித் கொடுத்தார். அண்மையில் புத்தாண்டை முன்னிட்டு, தம் குடும்பத்துடன் அஜித் சிங்கப்பூர் வந்திருந்தார்.

கார் பந்தயத்துக்குத் திரும்பியுள்ள அஜித், பிரசித்திபெற்ற ‘மிஷெலின் 24எச் சீரிஸ்’ போட்டியில் பங்கேற்கிறார். ஜனவரி 12, 13ஆம் தேதிகளில் அது நடைபெறுகிறது.