கடற்படை துப்பாக்கிச் சூட்டுக்குப் பிறகு இந்திய-இலங்கை உறவில் விரிசல் ஏற்படுமா??

இந்திய-இலங்கை மீன்பிடி நெருக்கடியை மனிதாபிமான முறையில் தீர்க்க இரு நாடுகளின் தலைவர்களும் ஒப்புக்கொண்ட இரண்டு மாதங்களுக்குள், வடக்கு கடலில் சட்டவிரோதமாக மீன்பிடித்துக் கொண்டிருந்த இரண்டு இந்திய மீனவர்கள் மீது இலங்கை கடற்படை துப்பாக்கிச் சூடு நடத்தி, அவர்களை காயப்படுத்தியுள்ளது.

இதற்கு டெல்லி அரசு இலங்கையைக் குறை கூறியுள்ளது.

ஜனவரி 27 ஆம் தேதி இரவு இந்திய மீன்பிடிக் கப்பலையும் , அதிலிருந்தவர்களையும் கைது செய்வதற்காக படகில் ஏறிய கடற்படை அதிகாரி ஒருவரின் துப்பாக்கியை மீனவர்கள் பறிக்க முயன்றபோது, ​​துப்பாக்கி வெடித்ததால் , இரண்டு இந்திய மீனவர்கள் துப்பாக்கிச் சூட்டுக்கு இலக்காகியுள்ளதாக கடற்படை செய்தித் தொடர்பாளர் கொமடோர் புத்திக சம்பத் தெரிவித்துள்ளார்.

இலங்கை கடற்படை, தனது மீனவர்கள் மீது துப்பாக்கிச் சூடு நடத்தியதற்கு மறுநாள் இந்திய அரசு இலங்கை அரசாங்கத்திடம் எதிர்ப்பு தெரிவித்தது.

“புது தில்லியில் உள்ள இலங்கையின் பதில் உயர் ஸ்தானிகரை நேற்று (28) காலை இந்திய வெளியுறவு அமைச்சகத்திற்கு வரவழைக்கப்பட்டு, இந்த சம்பவம் தொடர்பாக கடுமையான எதிர்ப்பை தெரிவித்துள்ளது.” “கொழும்பில் உள்ள எங்கள் உயர் ஸ்தானிகராலயம் இந்த பிரச்சினையை இலங்கை அரசாங்கத்தின் வெளிவிவகார அமைச்சகத்திடம் எழுப்பியுள்ளது” என்று இந்திய வெளிவிவகார அமைச்சகம் செவ்வாய்க்கிழமை (28) வெளியிட்ட அறிக்கையில் தெரிவித்துள்ளது.

காயமடைந்த இந்திய மீனவர்களான பாகு மற்றும் செந்தமிழ் ஆகியோர் யாழ்ப்பாணம் போதனா மருத்துவமனையில் சிகிச்சை பெற்று வருவதாக வடக்கின் செய்தியாளர்கள் தெரிவிக்கின்றனர்.

யாழ்ப்பாணத்தில் உள்ள இந்திய உயர் ஸ்தானிகராலயத்தின் துணை உயர் ஸ்தானிகர் சாய் முரளி, தேசிய மக்கள் சக்தியின் யாழ்ப்பாண மாவட்ட நாடாளுமன்ற உறுப்பினர் கருணாநாதன் இளங்குமரன் ஆகியோரும் ஜனவரி 28 ஆம் தேதி மருத்துவமனைக்குச் சென்று மீனவர்களைப் பார்வையிட்டனர்.

காயமடைந்தவர்களின் நலனைப் பார்வையிட மருத்துவமனைக்குச் சென்றிருந்த தேசிய மக்கள் சக்தி எம்.பி., சிகிச்சை பெற்று வரும் ஒரு இந்திய மீனவரிடம் கடலில் மீன்கள் கொல்லப்படும் விதம் குறித்து கேள்வி எழுப்பியிருந்தார்.

“இலங்கை எல்லைக்கு எத்தனை பேர் ஒரு அணியாக வந்தார்கள்? உன்னைத் தனியாக விட்டுவிட்டார்கள், இல்லையா? பயப்படாதீர்கள்.” எந்த பிரச்சினையும் இல்லை. நீங்கள் இலக்கை அதிகமாக அடைந்தால், உங்கள் சம்பளம் உயருமா? அதற்காகவா நீ இங்கு வருகிறாய்? இந்த வலை இந்தியாவில் தடை செய்யப்படவில்லையா? இந்தியாவில் கீழ்மட்ட இழுவைப் படகுகள் தடை செய்யப்பட்டுள்ளனதானே? ஆனா நீங்க அதைப் கண்டு கொண்ட மாதிரி தெரியல, இல்லையா? “நீங்கள் எங்கள் மீனவர்களது வலைகளை வெட்டுகிறீர்கள் என்று சொல்கிறார்கள், அது உண்மைதானே?” நாடாளுமன்ற உறுப்பினர் கருணநாதன் இளங்குமரன் தொடர்ச்சியான கேள்விகளை எழுப்பும்போது, ​​இந்திய மீனவர் பதிலழிக்க முடியாதவராக தவிப்பது உள்ளூர் பத்திரிகையாளர்களால் படம்பிடிக்கப்பட்ட வீடியோவில் காண முடிகிறது.

13 மீனவர்கள் கடற்படையினரால் கைது

யாழ்ப்பாணத்தின் வல்வெட்டித்துறை பகுதிக்கு அப்பால் இலங்கை கடல் எல்லைக்குள் நுழைந்து சட்டவிரோத மீன்பிடி நடவடிக்கைகளை மேற்கொண்ட ஒரு இந்திய மீன்பிடிக் கப்பலுடன், ஜனவரி 27, 2025 அன்று பதின்மூன்று இந்திய மீனவர்கள் கைது செய்யப்பட்டதாக இலங்கை கடற்படை கூறுகிறது.

கைது நடவடிக்கையின் போது கடற்படையினரது துப்பாக்கியால் இரண்டு இந்திய மீனவர்கள் காயமடைந்ததை கடற்படை பின்வருமாறு விளக்கியுள்ளது.

“அந்த நேரத்தில், கடற்படை வீரர் படகில் ஏறுவதைத் தடுக்கும் விதமாக நடந்து , அவர்களது வழக்கமான கடமைகளுக்கு இடையூறாக இருந்ததோடு, இந்திய மீனவர்கள் மீன்பிடிக் கப்பலை ஆக்ரோஷமாகக் கையாண்டு, பெரும் எதிர்ப்பை ஏற்படுத்துவதன் மூலம் ஆக்ரோஷமாக நடந்து கொண்டனர் எனவும், வழங்கப்பட்ட அதிகாரங்களின்படி கடற்படையினர், படகில் ஏற முற்பட்டபோது, ​​அந்த மீனவர்களில் ஒரு குழு கடற்படையினரை ஆக்ரோஷமான முறையில் தாக்க முயன்றதுடன், கடற்படை அதிகாரிகளின் உயிருக்கு ஆபத்தை விளைவிக்க முயல்வது போல, ஒரு கடற்படை அதிகாரியிடமிருந்து துப்பாக்கியைப் பறிக்க முயன்ற போதே துப்பாக்கி வெடித்தது. இதனால் இரண்டு மீனவர்களுக்கு சிறு காயங்கள் ஏற்பட்டன என ஶ்ரீலங்கா கடற்படை தரப்பால் தெரிவிக்கப்படுகிறது.

இரண்டு மீனவர்களுக்கும் அடிப்படை முதலுதவி அளித்த பின்னர், கடற்படையினர் உடனடியாக அவர்களை மேலதிக சிகிச்சைக்காக யாழ்ப்பாணம் போதனா மருத்துவமனையில் அனுமதித்ததாகவும், இந்த சம்பவம் தொடர்பாக காங்கேசன்துறை கடற்படை காவல்துறையிலும் புகார் அளித்துள்ளதாகவும் தெரிவிக்கப்படுகிறது.

‘மனிதாபிமான வழியில்’ தீர்வு காண்பது

2024 டிசம்பர் நடுப்பகுதியில், இலங்கை ஜனாதிபதியின் முதல் அதிகாரப்பூர்வ இந்திய பயணத்தின் போது, ​​புதுதில்லியில் இந்தியப் பிரதமருடன் நடத்தப்பட்ட கலந்துரையாடல்களின் போது, ​​இரு நாடுகளின் தலைவர்களும் மீன்பிடிப் பிரச்சினையை ‘முக்கியமானது’ என்று அடையாளம் கண்டிருந்தனர்.

“மீனவர்களின் பிரச்சினை மனிதாபிமான முறையில் தீர்க்கப்பட வேண்டும் என்று நாங்கள் விவாதித்தோம்,” என இந்தியப் பிரதமர் இலங்கை ஜனாதிபதியுடனான செய்தியாளர் சந்திப்பின் போது கூறியிருந்தார்.

இருப்பினும், மனிதாபிமான உதவிகளை வழங்குவது அல்லது பெறுவது குறித்து இனி எந்த விவாதங்களும் இருக்காது என்று மீன்வளம், நீர்வாழ் உயிரினங்கள் மற்றும் கடல்சார் வளத்துறை அமைச்சர் ராமலிங்கம் சந்திரசேகர், டிசம்பர் 27, 2024 வெள்ளிக்கிழமை யாழ்ப்பாணத்தில் பத்திரிகையாளர்களிடம் தெரிவித்திருந்தார்.

“எப்படியிருந்தாலும், மனிதாபிமான உதவிகளை வழங்கவோ அல்லது பெறவோ நாங்கள் பேச்சுவார்த்தை நடத்தப் போவதில்லை.”

மீன்வள அமைச்சக அதிகாரிகளுக்கும் இந்திய அதிகாரிகளுக்கும் இடையிலான கலந்துரையாடல்கள் நிறுத்தப்படாது என்றாலும், தொழில்நுட்பம், தொழில்முறை மற்றும் பிற விஷயங்களில் மட்டுமே அந்தக் கலந்துரையாடல்கள் தொடரும் என்று அமைச்சர் மேலும் தெரிவித்தார்.

ஜனவரி 28, 2025 செவ்வாய்க்கிழமை அமைச்சரவை முடிவுகள் குறித்து பத்திரிகையாளர்களுக்கு விளக்கமளித்த அமைச்சரவை ஊடகப் பேச்சாளர் அமைச்சர் டொக்டர் நளிந்த ஜயதிஸ்ஸ, இந்திய-இலங்கை மீன்பிடிப் பிரச்சினையைத் தீர்ப்பது என்பது இராஜதந்திர மட்டத்தில் மட்டுமே இருக்கும் ஒரு பிரச்சினை அல்ல என்று கூறினார்.

“எவ்வளவு ராஜதந்திர விவாதம் நடத்தினாலும், இந்தப் பிரச்சினையை நாம் ஒருபோதும் தீர்க்க முடியும் என்று நான் நினைக்கவில்லை.” ஆனால், நமது கடல் வளங்களையும் மீனவர்களையும் பாதுகாக்க இந்த விஷயத்தில் நாங்கள் எப்போதும் தலையிட்டு வருகிறோம். ” என்றார்.

இந்திய மீனவர்கள் வடக்கு கடலில் மீன்பிடிப்பதை ஒரு குற்றவியல் படையெடுப்பாகவே மீன்வளம், நீர்வாழ் மற்றும் கடல் தொழில் அமைச்சர் ராமலிங்கம் சந்திரசேகர் பார்க்கிறார்.