கொழும்பு விடுதியில் உணவு அல்லது பானம் விஷமாகி இரண்டு வெளிநாட்டு பெண்கள் பலி.

கொழும்பு, ஆர்.ஏ. டி மெல் வீதியில், முஹந்திர்ம் பாதையில் அமைந்துள்ள மிரக்கிள் கொழும்பு சிட்டி தங்கும் விடுதியில் தங்கியிருந்த இரண்டு வெளிநாட்டுப் பெண்கள் திடீர் உடல்நலக் குறைவால் மருத்துவமனையில் அனுமதிக்கப்பட்ட பின்னர் உயிரிழந்துள்ளனர். உணவு அல்லது பானம் விஷமாகியிருக்கலாம் என தற்போது சந்தேகிக்கப்படுகிறது.

24 வயதான பிரித்தானிய இளம்பெண் ஒருவர் 2ஆம் தேதியும், ஜெர்மன் நாட்டைச் சேர்ந்த பெண் ஒருவர் 3ஆம் தேதி இரவும் உயிரிழந்துள்ளனர்.

இரண்டு நட்சத்திர “ஹோஸ்டல்” என்று பெயரிடப்பட்டுள்ள இந்த தங்கும் விடுதியை கொழும்பு கோட்டை நீதவான் நீதிமன்றம் தற்காலிகமாக மூட உத்தரவிட்டுள்ளது.

கொல்லுப்பிட்டி பொலிஸார் நேற்று (3) நீதிமன்றத்தில் சமர்ப்பித்த மேலதிக விசாரணை அறிக்கையின்படி, அரச இரசாயன பகுப்பாய்வு திணைக்கள அதிகாரிகள் முழுமையான பரிசோதனை நடத்தி, இந்த இடம் தொடர்ந்து திறந்திருக்க தகுதியானதா என்பதை தீர்மானிக்கும் வரை இந்த மூடல் உத்தரவு அமலில் இருக்கும்.

உயிரிழந்த பெண்களின் உறவினர்கள் வந்து அவர்களின் உடல்களை அடையாளம் கண்ட பிறகு பிரேத பரிசோதனை செய்யப்படும் என்று பொலிஸார் மேலும் தெரிவிக்கின்றனர்.

பெப்ரவரி 2ஆம் தேதி, இந்த தங்கும் விடுதியில் தங்கியிருந்த மூன்று வெளிநாட்டினரும் உடல்நலக் குறைவால் மருத்துவமனையில் அனுமதிக்கப்பட்டனர்.

முதலில் உயிரிழந்தவர் பிரித்தானியாவைச் சேர்ந்த 24 வயது பெண். அவர் திடீரென உடல்நலக் குறைவால் பாதிக்கப்பட்டார். வாந்தி போன்ற அறிகுறிகளைக் காட்டினார். அவரது உடல்நிலை மோசமடைந்ததால் மருத்துவமனையில் அனுமதிக்கப்பட்டார். மருத்துவமனையில் அவர் உயிரிழந்தார். அவருடன் அறையில் தங்கியிருந்த ஜெர்மன் தம்பதியினரும் விஷ பாதிப்பு அறிகுறிகளைக் காட்டி உடல்நிலை மோசமடைந்ததால் கொழும்பு தேசிய மருத்துவமனையில் அனுமதிக்கப்பட்டனர். ஜெர்மன் பெண் உயிரிழந்தார். ஜெர்மன் இளைஞர் இன்னும் சிகிச்சை பெற்று வருகிறார்.

உயிரிழந்த பெண்களின் உடல்கள் பிரேத பரிசோதனை செய்யப்படவுள்ளன.

பொலிஸ் ஊடகப் பேச்சாளர் ஊடகங்களுக்கு கருத்து தெரிவிக்கையில், உயிரிழந்த ஒருவர் பிரித்தானியாவைச் சேர்ந்த 24 வயது பெண் என்பதை உறுதி செய்துள்ளதாகவும், மேலதிக தகவல்களை தற்போது வெளியிட முடியாது என்றும் தெரிவித்தார்.

பிரேத பரிசோதனை செய்யப்படவுள்ளது. உயிரிழந்த பெண்ணின் குடும்பத்தினர் வந்து உடலை அடையாளம் கண்ட பின்னரே அது நடைபெறும்.

பிரித்தானிய ஊடக அறிக்கைகளின்படி, சமீபத்தில் வியட்நாமில் இதுபோன்ற மற்றொரு துரதிர்ஷ்டவசமான சம்பவம் பதிவாகியுள்ளது. கிறிஸ்துமஸ் காலத்தில் பிரித்தானிய தம்பதியினர் வியட்நாமில் உள்ள உணவகத்தில் இருந்து வாங்கிய உள்நாட்டில் தயாரிக்கப்பட்ட லிமோன்செல்லோ பானத்தை குடித்த பிறகு உயிரிழந்தனர். பின்னர், அந்த பானத்தில் மெத்தனால் கலந்திருப்பது தெரியவந்தது.

இந்த சம்பவம் இலங்கையின் சுற்றுலாத் துறையில் தாக்கத்தை ஏற்படுத்தக்கூடும். சுற்றுலா தங்கும் வசதிகளை வழங்கும் நிறுவனங்களின் பாதுகாப்பு மற்றும் தரநிலைகள் குறித்து புதிய கலந்துரையாடலைத் தூண்டியுள்ளது. குறிப்பாக வெளிநாட்டு சுற்றுலா பயணிகளின் பாதுகாப்பை உறுதி செய்வதற்கான விதிகளை மேலும் கடுமையாக அமல்படுத்த வேண்டியதன் அவசியத்தை இது எடுத்துக்காட்டுகிறது.