அச்சுறுத்தல் விடுக்கப்பட்ட பூஸ்ஸ சிறை அதிகாரி சிரிதத் தம்மிக வீட்டில் சுட்டுக்கொல்லப்பட காரணம்?

காலி, அக்மீமன தலகஹ பகுதியில் இன்று (மார்ச் 13) நடந்த துப்பாக்கிச் சூட்டில் பூஸ்ஸ சிறையின் முன்னாள் அதிகாரி சிரிதத் தம்மிக (61) கொல்லப்பட்டார். அவர் வீட்டில் இருந்தபோது மோட்டார் சைக்கிளில் வந்த அடையாளம் தெரியாத இரண்டு துப்பாக்கிதாரிகள் அவரை சுட்டுக் கொன்றதாக போலீசார் தெரிவித்தனர்.

இந்த துப்பாக்கிச் சூடு அக்மீமன, தலகஹ பகுதியில் நடந்துள்ளது. கொல்லப்பட்ட அஹங்கம வலவகே சிரிதத் தம்மிக பூஸ்ஸ சிறையில் உதவி சிறை அதிகாரியாக பணியாற்றியபோது பொடி லசியின் கொலை மிரட்டலுக்கு ஆளானவர்.

குறிப்பாக, ஹெராயின் வைத்திருந்தது உள்ளிட்ட பல்வேறு குற்றங்களுக்காக கைது செய்யப்பட்டு பூஸ்ஸ சிறையில் அடைக்கப்பட்டிருந்த “பொடி லசி” என்று அழைக்கப்படும் அருமாஹந்தி ஜனித் மதுசங்க என்ற கொடிய குற்றவாளி 2020 ஆம் ஆண்டின் நடுப்பகுதியில் சிறை அதிகாரிகளுக்கு கொலை மிரட்டல் விடுத்தது தொடர்பான வழக்கு ஒன்றும் நிலுவையில் இருந்தது.

அந்த கொலை மிரட்டல்கள் சிறை ஆணையர் (நிர்வாகம் மற்றும் மறுவாழ்வு) ஜனக சந்தன லலித் பண்டார, சிறை ஆணையர் (செயல்பாடுகள்) துசித இந்திரஜித் உடுவர, சிறை ஆணையர் (உளவுத்துறை) விதானகே பிரசாத் பிரேமதிலக மற்றும் இன்று கொல்லப்பட்ட அப்போதைய உதவி சிறை அதிகாரி (பூஸ்ஸ) அஹங்கம வலவகே சிரிதத் தம்மிக ஆகிய அதிகாரிகளுக்கு விடுக்கப்பட்டன.

பொடி லசி அப்போதைய உயர் அதிகாரிகளை பகிரங்கமாக மிரட்டி, “தன்னை சிறையில் அடைத்தாலும், வெளியில் நடக்கும் தனது நடவடிக்கைகள் குறையாது என்றும், பூஸ்ஸ சிறை அதிகாரி முதல் யாராக இருந்தாலும் மரணம் தான் விதி என்றும், தனக்கு எதிராக செயல்பட்ட ஜெயிலரை கொன்றதாகவும்” கூறியிருந்தார்.

இந்த சம்பவம் தொடர்பாக குற்றப்பத்திரிகை தாக்கல் செய்யப்பட்ட நிலையில், நான்கு தனிநபர் பிணைகள் மூலம் பொடி லசி ஜாமீன் பெற்றார். பின்னர் வேறு வழக்குகளிலும் ஜாமீன் பெற்று பொடி லசி இந்தியாவுக்கு தப்பிச் சென்றார். அவர் மீண்டும் இந்தியாவில் கடந்த ஜனவரி மாதம் பிடிபட்டார்.

குற்றவாளிகள் அடைக்கப்பட்ட சிறைகளில் பணியாற்றிய பிறகு கொலை மிரட்டல்கள் வந்த சிறை அதிகாரிகள் இவ்வாறு வீட்டில் இருக்கும்போது கொல்லப்படுவது ஆபத்தான சூழ்நிலையை ஏற்படுத்தியுள்ளது.

பூஸ்ஸா சிறை அதிகாரி கொலை – கொலையாளிகள் பயன்படுத்தியதாக சந்தேகிக்கப்படும் 2 மோட்டார் சைக்கிள்கள் மீட்பு!

பூஸ்ஸா அதி பாதுகாப்பு சிறையின் முன்னாள் சிறை அதிகாரி சிரிதத் தம்மிக கொலையில் ஈடுபட்ட கொலையாளிகள் பயன்படுத்தியதாக கருதப்படும் கைவிடப்பட்ட 2 மோட்டார் சைக்கிள்கள் யக்கலமுல்லவில் கண்டுபிடிக்கப்பட்டுள்ளன.

தலஹவத்த பகுதியில் உள்ள சீதளதொல ஆரண்ய சேனாசனய சாலையில் உள்ள கட்டுபோல் தோட்டத்தில் கைவிடப்பட்ட நிலையில் இந்த சந்தேகத்திற்கிடமான 2 மோட்டார் சைக்கிள்கள் கண்டுபிடிக்கப்பட்டுள்ளன.

தற்போது கொலையாளிகளை தேடும் பணியில் யக்கலமுல்ல போலீசார் ஈடுபட்டுள்ளனர். அந்த பகுதியை சுற்றி வளைத்து தேடுதல் நடவடிக்கையை தொடங்கியுள்ளனர்.