ஹைதராபாத் அணிக்கு எதிரான லீக் போட்டியில் லக்னோ அணி அதிரடியாக விளையாடி அசத்தல் வெற்றி.

18வது ஐபிஎல் தொடர் நடைபெற்று வரும் நிலையில், ஹைதராபாத்தில் நேற்று (மார்ச்.27) ஹைதராபாத் மற்றும் லக்னோ இடையேயான லீக் போட்டி நடைபெற்றது. இப்போட்டியில் டாஸ் வென்ற லக்னோ அணி பந்து வீச்சை தேர்வு செய்தது.

முதல் இன்னிங்ஸை ஆடிய ஹைதராபாத் அணியில் தொடக்க ஆட்டகாரர்களாக டிராவிஸ் ஹெட், அபிஷேக் சர்மா ஆகியோர் களமிறங்கினர். இதில் அபிஷேக் வெறும் 9 ரன்களில் தனது விக்கெட்டை பறிகொடுத்தார். அடுத்ததாக களமிறங்கிய இஷான் கிஷன் டக் அவுட்டாகி ரசிகர்களை ஏமாற்றினார். தொடர்ந்து 47 ரன்கள் எடுத்து டிராவிஸ் ஹெட் விக்கெட்டை இழந்தார்.

அதன் பின்பு களமிறங்கிய நிதிஷ் குமார் ரெட்டி 32 ரன்களும், ஹென்ரிச் கிளாசென் 26 ரன்களும், அனிகேத் வர்மா 36 ரன்களும் எடுத்து ஆட்டமிழந்தனர். தொடர்ந்து பேட் கம்மிங்ஸ் 18 ரன்கள் எடுத்து ஆட்டமிழந்தார். மொத்தமாக 20 ஓவர்களின் முடிவுகளில் ஹைதராபாத் அணி 9 விக்கெட்டுகளை இழந்து லக்னோ அணிக்கு 191 ரன்களை இலக்காக நிர்ணயித்தது. இப்போட்டியில் ஏலத்தில் எடுக்கப்படாமல் முஹ்சின் கானுக்கு மாற்றாக களமிறங்கிய ஷர்துல் தாக்கூர் அதிகபட்சமாக 4 விக்கெட்டுகளை வீழ்த்தி அசத்தினார்.

இதனைத் தொடர்ந்து 192ரன்கள் எடுத்தால் வெற்றி என்கிற இலக்குடன் களமிறங்கிய லக்னோ அணியின் தொடக்க வீரர்களாக மிட்சல் மார்ஷலும், மார்கரமும் களமிறங்கினர். வந்த வேகத்திலேயே மார்க்கரம் விக்கெட்டை பறிகொடுத்து பெவிலியன் திரும்பினார். இதனைத் தொடர்ந்து நிக்கோலஸ் பூரனுடன் கைகோர்த்த மிட்சல் மார்ஷல் நிதானமாகவும் அதிரடியாகவும் விளையாடி ரன்களை சேர்த்தனர்.

இருவரின் பார்ட்னர்ஷிப்பில் 120 ரன்கள் சேர்த்த நிலையில் நிக்கோலஸ் பூரன் 26 பந்துகளில் 70ரன்கள் எடுத்து ஆட்டமிழந்தார். இதனைத் தொடர்ந்து களமிறங்கிய வீரர்கள் இரட்டை இலக்குகளில் ரன்களை சேர்த்த நிலையில் ஆட்டமிழந்தனர். இறுதியில் 14.1 ஓவரிலேயே லக்னோ அணி அதிரடியாக இலக்குக்கு தேவையான ரனகளை குவித்து வெற்றி பெற்றது. 23 பந்துகள் இருந்த நிலையில் 5விக்கெட்கள் வித்தியாசத்தில் லக்னோ வெற்றி பெற்று ரசிகர்களுக்கு சர்பிரைஸ் கொடுத்தது. ஆட்டநாயகனாக ஷர்துல் தாகூர் தேர்வு செய்யப்பட்டார்.