மியான்மரில் 1600 மரணங்கள் – நிவாரணக் குழுக்கள் சென்றடைவதில் சிரமம்!

மியான்மரில் கடந்த வெள்ளிக்கிழமை ஏற்பட்ட பெரிய நிலநடுக்கத்தில் பலியானவர்களின் எண்ணிக்கை இன்று காலை 1,644 ஆக அதிகரித்துள்ளது என்று மியான்மர் ஊடகங்கள் செய்தி வெளியிட்டுள்ளன.

3,408 பேர் காயமடைந்துள்ளதாக தகவல்கள் வந்துள்ளன என நாட்டின் ஆளும் இராணுவ அரசு நேற்று தெரிவித்தது. மேலும், இடிபாடுகளுக்குள் பலர் சிக்கியுள்ளனர். அவர்களை மீட்கும் பணிகள் தொடர்ந்து நடைபெற்று வருகின்றன. மீட்புப் பணிகள் மிகவும் கடினமான முயற்சியாக உள்ளது என்றும் கூறப்படுகிறது.

வெள்ளிக்கிழமை மத்திய மியான்மரில் சாகைங் நகருக்கு வடமேற்கே ஏற்பட்ட ரிக்டர் அளவுகோலில் 7.7 ஆக பதிவான ஆழமற்ற கடல் நிலநடுக்கம் மியான்மரின் பெரிய பகுதி மற்றும் தாய்லாந்தின் பாங்காக் தலைநகரிலும் பெரிய அழிவை ஏற்படுத்தியது. அண்டை நாடான தாய்லாந்தில், பாங்காக்கில் புதிதாக கட்டப்பட்ட 30 மாடி கட்டிடம் இடிந்து விழுந்ததில் சிக்கிய தொழிலாளர்களை மீட்கும் குழுக்கள் முயற்சி செய்து வருகின்றன.

பாங்காக் பெருநகர நிர்வாகம், இந்த நிலநடுக்கத்தில் இதுவரை 17 பேர் இறந்துள்ளனர் என்பதை உறுதிப்படுத்தியுள்ளது. மேலும், 32 பேர் காயமடைந்துள்ளனர் மற்றும் 83 பேரைக் காணவில்லை. காணாமல் போனவர்களில் பெரும்பாலானோர் இடிந்து விழுந்த கட்டிடத்திற்குள் சிக்கியவர்கள் என்று கூறப்படுகிறது.

மியான்மரில் நடந்து வரும் மனிதாபிமான நடவடிக்கைகளுக்கு சேதமடைந்த சாலைகள் மற்றும் உள்கட்டமைப்பு முக்கிய தடையாக உள்ளன. சில பேரழிவு பகுதிகளுக்கு நிவாரணக் குழுக்கள் சென்றடைவதில் சிரமம் இருப்பதாக ஐக்கிய நாடுகள் சபையின் மனிதாபிமான விவகார ஒருங்கிணைப்பு அலுவலகம் (OCHA) சனிக்கிழமை தெரிவித்துள்ளது. குறிப்பாக முக்கிய பாலங்கள் மற்றும் சாலைகள் உட்பட முக்கியமான உள்கட்டமைப்புகள் கடுமையாக சேதமடைந்துள்ளன. யாங்கோன்-நேய்பயி டோ-மாண்டலே அதிவேக நெடுஞ்சாலை சேதமடைந்ததால் சேவை தடைபட்டுள்ளது.