சேலை மூலம் 150 பேரின் உயிரை காப்பாற்றிய 70 வயது பெண்!

தண்டவாளத்தில் ஏற்பட்ட விரிசலை அறிந்து 70 வயது பெண் ஒருவர் தனது சேலையை கழற்றி, எதிரே வந்த ரயிலை நோக்கி அசைத்தார்.

இந்திய மாநிலமான உத்தரப் பிரதேசத்தைச் சேர்ந்த 70 வயது பெண் ஒருவர் தன்னுடைய புத்திசாலி தனத்தால் 150 பேரின் உயிரை காப்பாற்றியுள்ளார். இந்த சம்பவம் நடைபெற்று மூன்று வருடம் ஆகிறது.

70 வயது பெண் ஓம்வதி தேவி. இவர் சம்பவம் நடைபெற்ற நாளில் தண்டவாளத்தின் அருகே வழக்கம்போல நடைப்பயிற்சி மேற்கொண்டு வந்தார்.

அப்போது, அப்பகுதியில் அசாதாரணமாக நிகழ்வு ஒன்று நடந்திருப்பதை கண்டார். அதாவது, தண்டவாளத்தின் ஒரு பகுதியில் விரிசல் விட்டிருப்பதை கண்டார்.

இதனால் ஆபத்து ஏற்பட வாய்ப்புள்ளது என்று அவர் நினைத்துள்ளார். விரிசல் அடைந்த தண்டவாளத்தின் மீது ரயில் சென்றால் பயங்கரமான விபத்துக்கு வழிவகுத்து பயணிகளின் உயிருக்கு ஆபத்து விளைவிக்கும் என்று நினைத்தார்.

அந்த நேரத்தில் ரயில் ஒன்று வேகமாக வந்து கொண்டிருந்தது. உடனே, எதையும் யோசிக்காமல் தான் அணிந்திருந்த சிவப்பு நிற சேலையை கழற்றி எதிரே வந்த ரயிலை நோக்கி அசைத்தார்.

இதனை கண்ட ரயில் ஓட்டுநர் உடனடியாக ரயிலை நிறுத்தினார். இதனால் அந்த இடத்தில் பெரும் விபத்து தவிர்க்கப்பட்டது.