கனடாவில் துப்பாக்கிச் சூடு: இந்திய மாணவி பரிதாபமாக உயிரிழப்பு.

கனடாவின் ஒன்டாரியோ மாகாணத்தில் உள்ள ஹாமில்டன் நகரில் சோகமான சம்பவம் ஒன்று நிகழ்ந்துள்ளது. மொஹாவ்க் கல்லூரியில் படித்து வந்த இந்திய மாணவி ஹர்சிம்ரத் ரான்தவா, எதிர்பாராத விதமாக துப்பாக்கிக் குண்டு பாய்ந்து உயிரிழந்தார்.

சம்பவத்தன்று, வெள்ளிக்கிழமை அன்று ஹர்சிம்ரத் சவுத் பெண்ட் சாலையில் பேருந்துக்காக காத்திருந்தார். அப்போது, இரண்டு கார்களில் வந்த நபர்களுக்கு இடையே திடீரென துப்பாக்கிச் சண்டை மூண்டது. இரு தரப்பினரும் ஒருவரை ஒருவர் நோக்கி சரமாரியாக துப்பாக்கிகளால் சுட்டுக் கொண்டனர்.

இந்த துப்பாக்கிச் சண்டையின்போது, எதிர்பாராதவிதமாக அப்பகுதியில் இருந்த இந்திய மாணவி ஹர்சிம்ரத் ரான்தவா மீது துப்பாக்கிக் குண்டு ஒன்று பாய்ந்தது. படுகாயமடைந்த அவரை உடனடியாக மருத்துவமனையில் சேர்த்தனர். எனினும், அங்கு அளிக்கப்பட்ட தீவிர சிகிச்சை பலனின்றி அவர் பரிதாபமாக உயிரிழந்தார்.

இந்த துயர சம்பவம் குறித்து கனடா காவல்துறையினர் தீவிரமாக விசாரணை மேற்கொண்டு வருகின்றனர்.

இதனிடையே, டொரோன்டோவில் உள்ள இந்திய துணைத் தூதரகம் இந்த சம்பவம் குறித்து ஆழ்ந்த இரங்கல் தெரிவித்துள்ளது. “ஹாமில்டனில் இந்திய மாணவி ஹர்சிம்ரத் ரான்தவாவின் துயர மரணத்தால் நாங்கள் மிகவும் வருத்தமடைந்துள்ளோம். மாணவியின் குடும்பத்தினருடன் நாங்கள் தொடர்பில் இருக்கிறோம். அவர்களுக்கு தேவையான அனைத்து உதவிகளையும் செய்வோம்,” என்று துணைத் தூதரகம் கூறியுள்ளது.

கவலை அளிக்கும் விதமாக, கடந்த நான்கு மாதங்களில் கனடாவில் நான்கு இந்தியர்கள் கொல்லப்பட்டுள்ளனர். இதற்கு முன்பு, கடந்த 2024 டிசம்பர் 1ஆம் தேதி பஞ்சாபைச் சேர்ந்த 22 வயது முதுகலை மாணவர் குராசிஸ் சிங் கத்தியால் குத்திக் கொல்லப்பட்டார். அதேபோல், பஞ்சாபைச் சேர்ந்த மற்றொரு 22 வயது இந்திய மாணவி ரித்திகா ராஜ்புத் மரம் விழுந்து உயிரிழந்தார். டிசம்பர் 6ஆம் தேதி, எட்மண்டனில் 20 வயது இந்திய வம்சாவளியைச் சேர்ந்த ஹர்ஷன்தீப் சிங் ஒரு கும்பலால் சுட்டுக் கொல்லப்பட்டார். தற்போது, ஏப்ரல் 19ஆம் தேதி இளம் இந்திய மாணவி ஹர்சிம்ரத் ரான்தவா துப்பாக்கிச் சூட்டிற்கு பலியாகியுள்ளார். இந்த தொடர்ச்சியான சம்பவங்கள் கனடாவில் வசிக்கும் இந்தியர்கள் மத்தியில் பெரும் அச்சத்தையும் கவலையையும் ஏற்படுத்தியுள்ளது.