கொரோனாத் தொற்றாளர்களை ஏற்றிச் சென்ற இராணுவ பஸ் மோதி இரு பெண்கள் பலி! மூவர் படுகாயம்.

பொலனறுவை மனம்பிட்டிய தளுக்கனவாடிய வீதியில் இன்று அதிகாலை இடம்பெற்ற விபத்தில் பெண்கள் இருவர் உயிரிழந்துள்ளதுடன் மூவர் படுகாயமடைந்த நிலையில் வைத்தியசாலையில் சேர்க்கப்பட்டுள்ளனர்.

பொலனறுவையிலிருந்து மனம்பிட்டிய தனிமைப்படுத்தல் நிலையத்துக்குக் கொரோனாத் தொற்றாளர்களை அழைத்துச் சென்ற இராணுவ பஸ்ஸும் பொலனறுவை வைத்தியசாலைக்கு சுத்திகரிப்புப் பணியாளர்களை ஏற்றிச் சென்ற ஜீப் ரக வாகனமுமே நேருக்கு நேர் மோதி விபத்துக்குள்ளாகியுள்ளது.

விபத்தில் ஜீப்பில் பயணித்த பெண்களே உயிரிழந்துள்ளனர்.

குறித்த ஜீப்பில் 13 பேர் பயணித்துள்ளனர் என்று தெரியவருகின்றது.

விபத்தில் படுகாயமடைந்த மூன்று பெண்களின் நிலை கவலைக்கிடமாக இருக்கின்றது என வைத்தியசாலை வட்டாரத் தகவல்கள் தெரிவித்தன.