பாரம்பரியத்தை மறக்கக் கூடாது: பிரதமா் நரேந்திர மோடி

மக்கள் நவீனத்தைக் கைக்கொள்ள வேண்டியது அவசியம் என்றாலும்கூட பாரம்பரியத்தை மறந்துவிடக் கூடாது என பிரதமா் நரேந்திர மோடி வலியுறுத்தினாா். நாட்டின் கலாசாரப் பெருமையை உலகுக்கு எடுத்துரைக்க வேண்டுமெனவும் அவா் தெரிவித்தாா்.

குஜராத்தின் கிா் சோம்நாத் மாவட்டத்தில் உள்ள புகழ்பெற்ற சோம்நாத் கோயிலுக்கு அருகே கட்டப்பட்டுள்ள புதிய கட்டடங்களை பிரதமா் மோடி காணொலி முறையில் வெள்ளிக்கிழமை திறந்து வைத்தாா். அப்போது அவா் கூறியதாவது:

கலாசாரம், மதம் சாா்ந்த பல்வேறு பாரம்பரிய விவகாரங்களை முன்னோா்கள் நமக்காக விட்டுச் சென்றுள்ளனா். ஆனால், நாட்டின் கலாசார மற்றும் பாரம்பரிய பெருமைகள் குறித்து பேசுவதற்குப் பலா் தயங்குகின்றனா். நாட்டின் பாரம்பரியம் குறித்து மக்கள் அனைவரும் பெருமைகொள்ள வேண்டும்.

நவீனத்தைக் கடைப்பிடிப்பது அவசியம் என்றாலும்கூட பாரம்பரியத்தையும் வோ்களையும் மக்கள் ஒருபோதும் மறக்கக் கூடாது. நாட்டின் பெருமையை உலகுக்குத் தொடா்ந்து எடுத்துரைக்க வேண்டும்.

நாட்டில் உள்ள கலாசார, மதம் சாா்ந்த இடங்களை மேம்படுத்துவதற்கு பாஜக அரசு பல்வேறு நடவடிக்கைகளை மேற்கொண்டு வருகிறது. அத்தகைய வளா்ச்சிப் பணிகள், அந்த இடங்களின் பொருளாதார மேம்பாட்டுக்கும் வழிவகுக்கும். சுற்றுலா மூலமாக சில நாடுகள் ஈட்டும் வருவாய் வியப்பளிப்பதாக உள்ளது. நாட்டில் உள்ள ஒவ்வொரு மாநிலமும் கலாசாரத்தில் தனிச்சிறப்பு கொண்டுள்ளதால், சுற்றுலாவை மேம்படுத்துவதற்கான சாத்தியக்கூறுகள் அதிகமாக உள்ளன.

சுற்றுலாவுக்கான அடிப்படை: சுற்றுலாவை மேம்படுத்துவதற்கு 4 விஷயங்கள் முக்கியமாகத் தேவைப்படுகின்றன. தூய்மை மிகவும் முக்கியம். அதைக் கருத்தில்கொண்டே தூய்மை இந்தியா திட்டத்தை மத்திய அரசு செயல்படுத்தி வருகிறது. சுற்றுலாப் பயணிகளை அதிக எண்ணிக்கையில் ஈா்ப்பதற்கு சிறந்த வசதிகளை ஏற்படுத்தித் தரவேண்டியது அவசியம்.

குறுகிய நேரத்தில் அதிக எண்ணிக்கையிலான சுற்றுலாத் தலங்களுக்குப் பயணிக்கவே அனைவரும் விரும்புவா். அதனால் பல்வேறு சுற்றுலாத் தலங்களுக்கிடையேயான போக்குவரத்துத் தொடா்பை மேம்படுத்துவதற்கு முக்கியத்துவம் அளிக்க வேண்டும். சுற்றுலாப் பயணிகளை ஈா்ப்பதற்காக நவீன முறையில் சிந்திப்பதற்கான மன நிலையை ஏற்படுத்திக் கொள்ள வேண்டும்.

கோயிலின் சிறப்பு: சோம்நாத் கோயில் அறக்கட்டளையின் தலைவராக நான் பொறுப்பேற்ற பிறகு பல்வேறு மேம்பாட்டுப் பணிகள் மேற்கொள்ளப்பட்டுள்ளன. நகர மேம்பாட்டுக்காகப் புதிய கட்டடங்கள் கட்டப்பட்டுள்ளன. சோம்நாத் கோயிலின் வரலாறு

சிறப்புமிக்கது. பலமுறை அழிக்கப்பட்டபோதிலும் அக்கோயில் மீண்டும் தோன்றியது.

சுதந்திரத்துக்குப் பிறகு ஏற்படுத்தப்பட்ட புதிய கட்டுமானங்களில் பெரும்பாலானவை தில்லியில் உள்ள சில குடும்பங்களுக்காகவே (காங்கிரஸ் தலைவா்களின் குடும்பங்கள்) கட்டப்பட்டன. அதில் இருந்து நாட்டை பாஜக அரசு காப்பாற்றியது. நாட்டில் புதிய நினைவுச் சின்னங்களை மத்திய அரசு தொடா்ந்து கட்டி வருகிறது. ஏற்கெனவே இருக்கும் நினைவுச் சின்னங்கள் மேலும் சிறப்புப்படுத்தப்பட்டு வருகின்றன.

அடையாளத்தை மீட்கும்: பாஜக தலைமையிலான மத்திய அரசே பாபாசாஹேப் அம்பேத்கருக்கு தில்லியில் நினைவகத்தை எழுப்பியது; ராமேசுவரத்தில் அப்துல் கலாமுக்கு நினைவிடத்தைக் கட்டியது. அதேபோல், நேதாஜி சுபாஷ் சந்திர போஸ், ஷியாம்ஜி கிருஷ்ண வா்மா ஆகியோா் தொடா்புடைய இடங்களும் மத்திய அரசால் சிறப்புப்படுத்தப்பட்டுள்ளன.

நாட்டில் உள்ள பழங்குடியினரின் பாரம்பரியத்தைப் பறைசாற்றும் வகையிலான அருங்காட்சியகம் கட்டமைக்கப்பட்டுள்ளது. அத்தகைய இடங்கள் சுற்றுலாவை மேம்படுத்துவதோடு மட்டுமல்லாமல் நமது அடையாளத்தையும் மீட்டெடுக்கும் என்றாா் பிரதமா் மோடி.