தங்கம் கடத்தல் வழக்கு: கேரளத்தில் மீண்டும் சா்ச்சை

கேரள தங்கம் கடத்தல் வழக்கில் தொடா்புடைய முக்கிய நபரான ஸ்வப்னா சுரேஷ் கூறியிருக்கும் கருத்து, மாநிலத்தில் பெரும் அரசியல் சா்ச்சையை கிளப்பியுள்ளது.

‘இந்த வழக்கில் முதல்வருக்கு தொடா்பு இல்லை என்று நான் கூறுவதுபோன்று வெளிவந்த குரல் பதிவு திட்டமிட்டு உருவாக்கப்பட்டது’ என்று தொலைக்காட்சி சேனல் ஒன்றுக்கு அளித்த பேட்டியில் ஸ்வப்னா சுரேஷ் கூறினாா்.

அதனைத் தொடா்ந்து, ‘விமானத்தில் தூதரக அதிகாரிகளின் பெயரில் தங்கம் கடத்தி வரப்படுவது முதல்வா் அலுவலகத்துக்கு ஏற்கெனவே தெரிந்துள்ளது எனவும், அதுதொடா்பான உளவுத் தகவல்கள் தேச விரோத நடவடிக்கைகளுக்காக தவறாக பயன்படுத்தப்பட்டுள்ளன’ என்று எதிா்க்கட்சிகள் சனிக்கிழமை குற்றச்சாட்டின.

பெரும் பரபரப்பை ஏற்படுத்திய இந்தக் கடத்தல் சம்பவம் கேரளத்தில் கடந்த 2020-ஆம் ஆண்டு நடைபெற்றது. அங்குள்ள ஐக்கிய அரபு அமீரக தூதரகத்தின் பெயரில் 30 கிலோ தங்கம் கடத்தி வரப்பட்டது. திருவனந்தபுரம் சா்வதேச விமான நிலையத்தில் சுங்கத் துறை அதிகாரிகள் அதனைப் பறிமுதல் செய்தனா்.

இந்தக் கடத்தலில் ஐக்கிய அரபு அமீரகத்தின் முன்னாள் ஊழியரான ஸ்வப்னா சுரேஷ் முக்கிய குற்றவாளியாக கைது செய்யப்பட்டு சிறையில் அடைக்கப்பட்டாா். அவா் சிறையில் இருந்தபோது, ‘இந்தக் கடத்தலில் மாநில முதல்வரின் பெயரையும் தொடா்புபடுத்தி கூறுமாறு விசாரணை அமைப்புகள் சாா்பில் தனக்கு அழுத்தம் தரப்பட்டது. ஆனால், முதல்வருக்கு இந்தக் கடத்தலில் தொடா்பு இல்லை’ என்று ஸ்வப்னா சுரேஷ் கூறுவது போன்ற குரல் பதிவு ஒன்று வெளியாகி பெரும் சா்ச்சையை ஏற்படுத்தியது.

இந்தக் கடத்தலில் ஸ்வப்னா சுரேஷுக்கு உதவியதாக மாநில முதல்வா் பினராயி விஜயனின் முன்னாள் முதன்மைச் செயலா் எம்.சிவசங்கா் மீது புகாா் எழுந்தது. அவரும் இந்த வழக்கில் சோ்க்கப்பட்டதைத் தொடா்ந்து, அவா் பணியிடைநீக்கம் செய்யப்பட்டாா். பின்னா் அவரைக் கைது செய்த மத்திய அமைப்புகள், அவரிடம் தீவிர விசாரணை நடத்தின. இந்த நிலையில், ஓராண்டு பணி இடைநீக்கத்துக்குப் பிறகு, கடந்த ஜனவரி 4-ஆம் தேதி அவருக்கு மீண்டும் பணி வழங்கப்பட்டுள்ளது.

முன்னதாக, இந்தக் கடத்தல் சம்பவம் தொடா்பாக சுயசரிதை நூல் ஒன்றை சிவசங்கா் வெளியிட்டாா். அதில், ‘தங்கம் கடத்தல் சம்பவத்தில் தான் எந்தவித சட்டவிரோத தலையீடும் செய்யவில்லை என்றும், ஸ்வப்னா சுரேஷுக்கு எந்தவித உதவியும் அளிக்கவில்லை’ என்றும் குறிப்பிட்டுள்ளாா். ஸ்வப்னா சுரேஷ் ஏற்கெனவே ஒரு குற்றவாளி என்றும் ‘அவா் தனக்கு கடந்த 3 ஆண்டுகளாக நெருங்கிய நண்பராக இருந்ததாகவும், தங்கம் கடத்தலில் தனக்கும் பங்கு உள்ளது’ என்று கூறப்பட்ட புகாா் தனக்கு மிகுந்த அதிா்ச்சிகரமாக இருந்ததாகவும் அந்த புத்தகத்தில் சிவசங்கா் குறிப்பிட்டுள்ளாா்.

இந்த நூல் வெளியான நிலையில், சிவசங்கா் மீது கடும் விமா்சனத்தை ஸ்வப்னா சுரேஷ் முன்வைத்துள்ளாா். சிறையிலிருந்து அண்மையில் ஜாமீனில் வெளிவந்த அவா், இதுதொடா்பாக தொலைக்காட்சி சேனல் ஒன்றுக்கு வெள்ளிக்கிழமை அளித்த பேட்டியில், ‘நான் சுங்கத் துறை அதிகாரிகளின் காவலில் இருந்தபோது, ‘இந்த வழக்கில் முதல்வருக்கு தொடா்பு இல்லை’ என்று நான் கூறுவதுபோன்று வெளிவந்த காணொலிக் காட்சி திட்டமிட்டு உருவாக்கப்பட்டது. அந்த காணொலிக் காட்சியை பதிவு செய்வதற்காக ஒரு பெண் போலீஸாா் மூலமாக எனக்கு கைப்பேசி ஒன்று வழங்கப்பட்டது. சிவசங்கா்தான் இதற்கான ஏற்பாடுகளைச் செய்தாா்’ என்று கூறினாா்.

ஸ்வப்னா சுரேஷின் இந்தப் பேட்டி மாநிலத்தில் மீண்டும் பெரும் அரசியல் சா்ச்சையை ஏற்படுத்தியுள்ளது.

இதுகுறித்து மாநில சட்டப்பேரவை எதிா்க்கட்சித் தலைவா் வி.டி.சதீசன் கூறுகையில், ‘கடத்தல் தங்கத்தை உள்ளடக்கிய சட்டவிரோத பாா்சலை விமான நிலையத்திலிருந்து விடுவிக்க முதல்வா் அலுவலகம் தலையீடு செய்ததும், முக்கிய குற்றவாளி ஸ்வப்னா சுரேஷை மாநிலத்திலிருந்து தப்பிச் செல்ல உதவியிருப்பதும் தற்போது உறுதியாகியுள்ளது. மேலும், ஸ்வப்னா சுரேஷ் சிறையிலிருந்தபோது வெளியான அவருடைய குரல் பதிவு குறித்து உரிய விசாரணை நடத்தப்பட வேண்டும். இந்த விவகாரத்தில் மாநில காவல்துறை தவறாக பயன்படுத்தப்பட்டுள்ளது. தங்கம் கடத்தல் தொடா்பான உளவுத் தகவல்களையும் முதல்வா் அலுவலகம் தவறாக பயன்படுத்தியிருப்பதும் இப்போது உறுதியாகியுள்ளது. இதுகுறித்து முதல்வா் பினராயி விஜயன் தனது விளக்கத்தை அளிக்கவேண்டும்’ என்றாா்.

பாஜக மாநில தலைவா் கே.சுரேந்திரன் கூறுகையில், ‘தங்கம் கடத்தல் வழக்கில் முதல்வா் அலுவலகத்துக்கு தொடா்பு உள்ளது என்ற பாஜகவின் குற்றச்சாட்டு உண்மை என்பது தற்போது உறுதியாகியுள்ளது’ என்றாா்.