பிரான்ஸ் அரசுத் தலைவர் தேர்தலில் வெல்லப்போவது யார்? : சண் தவராஜா

மறுபுறம், உள்நாட்டில் இளைஞர்களும், தொழிலாளி வர்க்கமும் பிரதான வேட்பாளர்களை விட்டு விலகிச் செல்லும் போக்கே தென்படுகின்றது. ‘செல்வந்தர்களின் அதிபர்’ என வர்ணிக்கப்படும் மக்ரோனும், ‘நவ பாசிசவாதி’ என வர்ணிக்கப்படும்  லீ   பென் அம்மையாரும் இளைஞர்களதும், தொழிலாளி வர்க்கத்தினதும் கவனத்துக்கு உரியவர்களாக இல்லாமற் போவதைப் புரிந்து கொள்ள முடிகின்றது.

இதனாலேயே அவர்கள் மூன்றாவது இடத்தைப் பிடித்த இடதுசாரி வேட்பாளரான ஜீன் லக் மெலன்சோன் அவர்களுக்கு அதிகளவில் வாக்களித்திருந்தனர். அளிக்கப்பட்ட மொத்த வாக்குகளில்; 21.95 விழுக்காடு வாக்குகளை அவர் பெற்றிருந்தார். 23.15 விழுக்காடு வாக்குகளைப் பெற்று இரண்டாவது இடத்தைப் பெற்றுக்கொண்ட லீ பென் அவர்களை விடவும் 420,882 வாக்குகளையே அவர் குறைவாகப் பெற்றிருந்தார் என்பதுவும் குறிப்பிடத்தக்கது. அதேவேளை, 27.85 விழுக்காடு வாக்குகளைப் பெற்ற மக்ரோன், லீ பென் அவர்களை விடவும் 1,649,529 வாக்குகளையே அதிகமாகப் பெற்றிருந்தார்.

முதலாம் மற்றும் இரண்டாம் இடங்களைப் பெற்ற வேட்பாளர்கள் இருவரும் அளிக்கப்பட்ட வாக்குகளில் மொத்தம் 51 விழுக்காடு வாக்குகளையே பெற்றிருந்தனர். மொத்த வாக்காளர்களில் 75 விழுக்காடு வாக்காளர்கள் மாத்திரமே வாக்களிப்பில் கலந்து கொண்டிருந்தனர். 12 வேட்பாளர்கள் போட்டியிட்ட இந்தத் தேர்தலில் முதல் இருவரைத் தவிர மற்ற ஒன்பது பெரும் இணைந்து 49 விழுக்காடு வாக்குகளைப் பெற்றிருந்தனர் என்பது பிரான்ஸ் மக்களிடையே நிலவும் பிளவுபட்ட மனநிலையைத் தெளிவாக உணர்த்தப் போதுமானது. அது மாத்திரமன்றி அடுத்த அரசுத் தலைவராக வர உள்ள ஒருவரை சுமார் அரைவாசி அளவிலான மக்கள் ஆதரித்து நிற்கவில்லை என்பதையும் இந்த முடிவுகள் உணர்த்துகின்றன.

வாக்களித்தவர்களில் 35-64 வயதுக்கு உட்பட்டவர்களில் அநேகர் லீ பென் அம்மையாரை ஆதரித்துள்ளதாகவும், 65 வயதுக்கு மேற்பட்டவர்களில் அநேகர் மக்ரோனுக்கு அதிக அளவில் வாக்களித்ததாகவும் தகவல்கள் வெளியாகி உள்ளன. இளைய தலைமுறையினர் மத்தியில் வலதுசாரிக் கருத்துக்களின் பரவல் அதிகமாக உள்ளதை இந்தப் போக்கு உணர்த்துகின்றது. இது எதிர்காலம் தொடர்பிலான கவலைகளையும் ஏற்படுத்துகின்றது.

24ஆம் திகதி நடைபெறப் போகும் இரண்டாம் கட்டத் தேர்தல் தொடர்பிலான கருத்துக் கணிப்புகள் தற்போது வெளியாகி உள்ளன. பெரும்பாலும் 51-49 என்ற விகித அடிப்படையிலேயே மக்ரோன் வெற்றி பெற வாய்ப்பு உள்ளதாக ஒரு கருத்துக் கணிப்பு தெரிவிக்கும் அதேவேளை, லீ பென் அம்மையார் 50.5-49.5 என்ற விகித அடிப்படையில் வெற்றி பெற வாய்ப்பு உள்ளதாக மற்றுமொரு கருத்துக் கணிப்பு தெரிவிக்கின்றது. மீதமுள்ள வேட்பாளர்களில் ஒருவரைத் தவிர மற்றவர்கள் மக்ரோனுக்கே தமது ஆதரவாளர்கள் வாக்களிக்க வேண்டும்,

தீவிர வலதுசாரிகளின் கரங்களில் ஆட்;சியதிகாரம் செல்வது ஆபத்தானது எனக் கோரிக்கை விடுத்துள்ள போதிலும் அவர்களது ஆதரவாளர்கள் அந்தக் கோரிக்கையை நூறு விழுக்காடு செவிமடுப்பார்களா என்ற கேள்வி எழுகின்றது. மறுபுறம், யார் வென்றாலும் அது சாமானிய மக்களுக்கான ஆட்சியாக இருக்காது, எனவே தேர்தலைப் புறக்கணிக்க வேண்டும் என்ற கோரிக்கையும் வலுப்பெற்று வருகின்றது.

ஜனநாயகத்தில் தேர்தல்கள் மிகவும் முக்கியமானவை. ஆனால், தேர்தல்களில் ஆர்வத்தோடு பங்கெடுக்கும் மக்களின் எண்ணிக்கை நாளுக்கு நாள் குறைவடைந்து வருவதையே உலகளாவிய அளவில் பார்க்க முடிகின்றது. இதனை ஜனநாயக முறைமையின் மீது மக்கள் நம்பிக்கையை இழந்து வருகின்றார்கள் என்றவாறாகப் புரிந்து கொள்வதா அன்றி பொதுவாக அரசியல் மீதே மக்கள் வெறுப்புக் கொண்டுள்ளார்களா எனப் புரிந்து கொள்வதா எனத் தெரியவில்லை. அதே வேளை, தேர்தல் ஜனநாயகத்தில் பெரும்பான்மை மக்களின் விருப்புக்கு மாறான தெரிவுகள் இடம்பெறும் சூழல் உள்ளதையும் அவதானிக்க முடிகின்றது.

நீண்ட ஜனநாயகப் பாரம்பரியத்தைக் கொண்ட பிரான்ஸ் நாட்டிலும் இதே நிலையே உள்ளது. தங்கள் அபிலாசைகளைப் பிரதிபலிக்கும் எவரும் தேர்தல் களத்தில் இல்லை என்ற எண்ணமே தேர்தலைப் பகிஸ்கரிக்க வேண்டும் என்ற கோரிக்கைக்கான பிரதான காரணமாக உள்ள நிலையில், தமது ஜனநாயகக் கடமையைத் தவற விடுவது சரியானதா என்ற கேள்வியும் எழுகின்றது. முடிவில், ஒருவரை விடவும் மற்றவர் ஓரளவேனும் பரவாயில்லை என்ற அடிப்படையில் வாக்களிப்பது ஒன்றே மக்களின் மீது திணிக்கப்படும் முடிவாக உள்ளது. பிரான்ஸ் அரசுத் தலைவர் தேர்தலிலும் அந்த அடிப்படையிலேயே ஒருவர் அரசுத் தலைவராகத் தேர்ந்தெடுக்கப்படும் வாய்ப்பு உள்ளது என்பது மாத்திரமே கசப்பான யதார்த்தம்.