யாழில் 15 பவுண் தங்க நகைகள் திருடிய 2 பேர் வசமாக மாட்டினர்!

யாழ்ப்பாணத்தில் வீதியில் மோட்டார் சைக்கிளில் பயணித்த தம்பதியிடம் தங்க நகைகளை அபகரித்த இருவர் பொலிஸ் புலனாய்வுப் பிரிவினரினால் கைதுசெய்யப்பட்டுள்ளனர்.

கடந்த 9ஆம் திகதி கல்வியங்காடு – செம்மணி, ஆடியபாதம் வீதியில் வைத்து வவுனியாவைச் சேர்ந்த தம்பதியிடம் 15 பவுண் நகைகள் கொள்ளையடிக்கப்பட்டன. இது தொடர்பாக அன்றே கோப்பாய் பொலிஸ் நிலையத்தில் முறைப்பாடு செய்யப்பட்டது .

வவுனியாவிலிருந்து வட்டுக்கோட்டையில் இடம்பெற்ற திருமண நிகழ்வுக்கு வருகை தந்து திரும்பியபோதே சம்பவம் இடம்பெற்றது என்று பொலிஸார் தெரிவித்தனர்.

இதற்கமைய கோப்பாய் பொலிஸ் புலனாய்வுப் பிரிவினர் முன்னெடுத்த விசாரணைகளின் அடிப்படையில் நாவற்குழியைச் சேர்ந்த 19 மற்றும் 22 வயதுடைய இருவர் இன்று கைதுசெய்யப்பட்டனர்.

சந்தேகநபர்களிடமிருந்து கொள்ளையிட்ட நகைகள் பொலிஸாரல் மீட்கப்பட்ட அதேவேளை இருவரும் கோப்பாய் பொலிஸாரிடம் ஒப்படைக்கப்பட்டுள்ளனர்.