அடுத்த சுற்றுக்குத் தகுதி பெற்றது உடுப்பிட்டி நவஜீவன்ஸ் விளையாட்டுக் கழக அணி

கடும் போரட்டத்திற்கு பின் வெற்றி கனியை சுவைத்தது உடுப்பிட்டி நவஜீவன்ஸ் விளையாட்டுக் கழக அணி.

யாழ்ப்பாண மாவட்ட கரப்பந்தாட்டச் சங்கத்தின் அனுமதியுடன் தெல்லிப்பளைமின்னலடியாக்கி (M. A JACKY) விளையாட்டுக்கழகம் முதல்முறையாக. மின்னொளியில் நடத்தும் கரப்பந்தாட்ட சுற்று போட்டித் தொடர் நேற்று (ஞாயிற்றுக்கிழமை) கழக மைதானத்தில் ஆரம்பமானது.

இதில் ஏ. பிரிவினருக்கான ஆட்டத்தில் உடுப்பிட்டி நவஜீவன்ஸ் விளையாட்டுக் கழக அணியை எதிர்த்து பன்னாலை கணேசன் விளையாட்டுக் கழக அணி மோதியது.

மூன்று செற்களைக் கொண்டதாக இடம் பெற்ற இந்த ஆட்டத்தில் உடுப்பிட்டி நவஜீவன்ஸ் விளையாட்டுக் கழக அணியினர் முதலாவது சுற்று ஆட்டத்தினை 25:13 என்ற புள்ளி அடிப்படையில் வெற்றி பெற்றனர்.

பதிலுக்கு பன்னாலை கணேசன் விளையாட்டுக் கழக .அணியினர் கடும் போரட்டத்திற்கு மத்தியில் 30:28 என்ற புள்ளி அடிப்படையில் இரண்டாவது சுற்று ஆட்டத்தினை வெற்றி பெற்றனர்.

வெற்றி தோல்வியை தீர்மானிப்பதற்காக இடம் பெற்ற மூன்றாவதுசுற்று ஆட்டத்தில் உடுப்பிட்டி நவஜீவன்ஸ் விளையாட்டுக் கழக அணியினர் கடும் போரட்டத்திற்கு பின்னர் 25:20 என்ற புள்ளி அடிப்படையில் வெற்றி பெற்றனர்.

ஆட்ட நேர முடிவில் 2:1 என்ற செற் கணக்கில் உடுப்பிட்டி நவஜீவன்ஸ் விளையாட்டுக் கழக அணி வெற்றி பெற்று அடுத்த சுற்றுக்குத் தகுதி பெற்றது.